- Lufta her og vatnet er noko for seg sjølv

• Kva type bedrift arbeider du i?  Eg jobbar i ei bedrift som heiter Atheno. Visjonen vår er at me skal ver i spissen av næringsutvikling i Sunnhordlandsregionen, og i det ligg det at me skal fremja ein unik kultur for nyskaping i Sunnhordland og bidra til auka innovasjon og verdiskaping i nye og eksisterande bedrifter. Dette gjer me ved å arbeide med entreprenørskap i skulen, tilby rettleiing og idéutvikling for dei som ynskjer å starte for seg sjølv, tett oppfølging for vidareutvikling og kommersialisering av nye selskapsetableringar, hjelp til målretta arbeid for vekst i eksisterande bedrifter, i tillegg til å vere knutepunktet for bedriftsutvikling og industriklynga i Sunnhordland.

• Korleis fekk du denne jobben? Me kom til Stord i kjølevatnet av oljekrisa, og opplevde litt av det same problemet ein ser i dag kva gjeld «jobb nummer 2» -og eg stod utan jobb. Som relativt nyutdanna innan entreprenørskap var Atheno og Verket ein plass som fanga interessa mi. Heldigvis for meg er det eit varmt og raust miljø der eg fekk komma, vere og lære, og etter ei stund i miljøet var eg så heldig å få jobb der!

• Kvifor var den interessant for deg? Med ein bachelor innan entreprenørskap og økonomi følte eg at den var skreddarsydd for meg. Her får eg nytta meg av utdanninga mi, i tillegg til ein veldig variert arbeidsdag med høgt tempo –som kanskje er det viktigaste for meg; ingen dag er lik.

• Kva går arbeidet ditt ut på? Eg arbeidar primært med det som me kallar 1.linje/etablerartenesta i Sunnhordland. Her rettleiar me alle som går rundt med ein forretningsidé, held kurs og andre relevante arrangement for gründerar og næringslivet på Stord. Me jobbar ganske bredt og takkar sjeldan nei når me blir utfordra på ting, så ein får blitt med på ganske mykje anna som ligg utanfor sjølve etablerertenesta.

• Kvifor valte du å arbeide og busetje deg i Sunnhordland? Her var det sambuaren min som fekk tilbod om ein jobb og eg som «blei med på lasset». Men me er begge født og vaks (delvis) opp her begge to, så eit heilt unaturleg val var det ikkje, det låg vel i korta at me skulle tilbake her når det var dags å slå seg til ro. Ei avgjersle eg er veldig glad for i dag!

• Kva er ekstra bra med å bu her forutan jobben? Det er vanskeleg å unngå klisjeen om nærleiken til alt! Sjø, fjell, kultur, puls -eit lite stykke Noreg komprimert ned til 143,7 kvadratkilometer- med eit par timars biltur eller flytur om ein har behov for litt meir by. Lufta her og vatnet er noko for seg sjølv, og eg hugsar eg kjøpte meg eit duftlys som lukta sjø når eg budde i Oslo, berre for å kjenne lukta av «heim» når saknet vart for stort.

• Kva er dine tips til andre som vurderer å flytte til Sunnhordland? Følg Buisunnhordland på facebook for å bli oppdatert på spennande jobbar i regionen -og her skjer det mykje spennande i dei kommande åra, altså!. Kjem du utan nettverk så har Sunnhordland mange kjekke frukostmøter og spennande frivillige organisasjonar! Og så håpar eg «Hjelp(?), eg har flytta til Stord!» -eit lågterskelstilbod for tilflyttarar held fram med samlingar.
   
• Ein perfekt arbeidsdag for meg er:
  Ein dag som har litt av alt: Vekesmøte med gode kollegaer, etablerarrettleiing om ein ny og spennande idé!  Får eg lurt meg med på eit bedriftsbesøk hos ei av dei mange dyktige inkubatorbedriftene me har i Atheno eller eit kjekt arrangement så er dagen komplett! Særleg om det er sol og me kan ta lunsjen ute.