- Eg har alltid vore interessert i kva som kjenneteiknar den gode samtalen i utdannings-samanheng

• Kva type bedrift arbeider du i? Eg arbeidar i høgare utdanning, i barnehage- og grunnskulelærarutdanninga. Akkurat no er eg i eit doktorgradsstipend.
  
  
• Korleis fekk du denne jobben? Eg søkte på eit doktorgradsstipend der dei trong nokon til å forska på korleis studentar kan få opplæring i å samtala om naturen og naturfaglege tema med barnehagebarn. Eg synest det høyrtest utruleg spennande ut, og var heldig å få jobben! 
  
  
• Kvifor var den interessant for deg? Eg har alltid vore interessert i kva som kjenneteiknar den gode samtalen i utdanningssamanheng, og sidan eg sjølv hadde barnehagebarn på den tida var eg både interessert og forundra over alt dei spurte om og var interesserte i når me var ute i naturen.
  
  
• Kva går arbeidet ditt ut på? For tida skriv eg forskingsartiklar saman med kollegaer innanfor same fagområde, basert på videomateriale frå barnehagar. Utanom det,- er det undervisning eg har gjort mest av.
  
  
• Kvifor valte du å arbeide og busetje deg i Sunnhordland? Me valte å busetja oss på Stord fordi det var viktig for meg å bu nær arbeidet mitt på HVL, - og så er eg gift med ein Stordabu.

• Kva er ekstra bra med å bu her forutan jobben? Det må vera at det er stort nok til at det alltid er eit eller fleire arrangement å gå på, og lite nok til at du kan rekna med å treffa nokon kjente der.
  
  
• Kva er dine tips til andre som vurderer å flytte til Sunnhordland? At det er ein kjekk plass å bu! Det som var mest overraskande på meg var alle dei fine turområda, og at det finns så utruleg mange organisjonar og lag. Noko for ein kvar smak.
  
  
• Ein perfekt arbeidsdag for meg er: Ein perfekt arbeidsdag startar med ein kopp kaffi og kjekk prat med kollegaer, eg møter engasjerte studentar og ideelt sett: - Eg får skrive det eg hadde tenkt å skriva. Toppar det med eit bad i Breivikjo med HVL sin eigen badeklubb!